Geguritane Sardono Syarief

LAYANG IKI

layang iki

dak kirim kanggo awakmu,

cah ayu

layang iki tampanana

kanthi ati lega

aja kesusu  nesu

layang iki suweken amplope

wacanen isine

tresepna karepe

layang iki

wacanen tenan

aku ora duwe niat anggawe kapitunan

yen tresnaku  marang  sliramu

wah,……

ora ngapusi

setengah mati

ora karuan!

pekalongan, 25 Mei 2010

                   

KENYA TELU

Kenya  telu

Mloka-mlaku

Liwat ngarep omahku

Kenya  telu

Ngguya-ngguyu

Padha ayu

Siji bu guru

Siji bidhan desa

Siji bu perawat

Padha-padha mbalang mripat

Kenya  telu

Kabeh legan

Durung duwe gandhengan

Bingung aku  nemtukke  pilihan

Bu guru,

Bu perawat,

Apa bu bidhan?

Dhuh biyung!

Kenya pundi ingkang pas kangge sisihan?

Paninggaran, 25 Mei 2010

  

BU GURU

Dudu marga awakmu guru

Jur aku kepencut sliramu

Dudu marga saben sasi

Awakmu nampa gaji

Jur aku mbalang ati

Dudu marga awakmu kenya mbandha

Jur aku muwu tresna

Tenan bu guru

Kepencutku  marang sliramu

Marga solah bawamu

Sing sarwa grapyak sumanak

Akur sumedulur

Sumeh ora dumeh

Tenan bu guru

Aku kepingin

Mbesok sasi wolu

Awakmu arep dakcincin.

Paninggaran, 25  Mei 2010

 

LAYAT

Sore nglangut

Iring-iringan pelayat

Bareng-bareng mangkat

Ngeterke jenazah

Nuju omah abadhi

Kanggo istirah

Ngadhep ngarso Gusti

Sing nguwasani kita kabeh iki

Sore sepi

Godhong kembang makaman tiba siji-siji

 ning bumi

Melu bela sungkawa kanggo sing mati

Ya Allah, ya Robbi!

                                                                                         Paninggaran-Pekalongan,2009

 

AREP MLAYU NGENDI?

Saiki wis  tekan makaman

Sing ndhudhuk luwang wis padha nadhahke tangan

Nyandhak sliramu

Karep nurokke ragamu  ana ing jero

Luwang kono

Saiki wis padha dedonga

Supaya sliramu ngerti  

Yen ing sajerone luwang   kuwi

Sliramu bakal  ditangiake

Gusti kang maha luwih

Sliramu arep ditakoni

Oleh-oleh apa sing digawa bali

Saka alam dunya iki?

La yen kowe arep takon mati?

Iku mung ragamu sing mati

Sing wis ora bakal bisa bali

Sliramu  arep abadhi

 nanggung jawabi

apa sing kokgawa

 nalika urip ing ndonya

Saiki wong-wong sing ngeter kowe wis padha bali

Sliramu ditinggal   dhewe ana kene

La yen kowe wedi ngadhepi

sapa sing bakal nemoni?

Wong-wong kabeh wis ora bisa nulungi!

Arep mlayu ngendi?

Paninggaran, 2009