Geguritane Sardono Syarief

AJA KANDHA-KANDHA

Aja kandha-kandha,

Yen sliramu lagi nandang asmara

Mengko awak iki bisa cilaka

Yen wong sing nduweni sliramu dadi ngerti

Terusing duwe sipat lali

Amarga cemburu ana ing sajeroning ati

Aja kandha-kanha

Yen sliramu lagi nandang asmara

Amarga bocah angon cilik ndesa iki

Uga nandang lara kang padha

Lara asmara

Dhuh, wulan kang tansah kepengin dak sawang!

Saumpama aku iki srengenge

Pengin aku ngilangna panase geni

Supaya sliramu ora kepanasen

Sadawane dina

Saumpama aku iki ora eling

Yen  ing omah iki aku wis duwe kaluwarga

Temtu aku lila, kabeh dak tinggal lunga

Nuju sliramu ana ing tlatah Jawa

Najan alas ri lan gunung dhuwur kudu bisa

Dak singkirna, ora apa-apa

Dhuh, wulan kang tansah ayu!

Aja kandha-kandha

Yen sliramu lagi nandang asmara

Amarga lara atimu

Lara atiku uga

Paninggaran-pekalongan, 2008

WULAN

Wulan ing ndhuwur langit kae

durung pecah

cahyane padhang jingglang

nentremke ati sapa bae sing nyawang

Wulan ing nduwur langit kae

Dhuh, endhahe!

Pengin aku nyedhak, nyawel, ngrangkul, lan ngemuli

Ana ing sajeroning ati

Karoben ra asrep kaya nalika

Kasiram banyu embun lan lumayune angin gunung

Wulan ing ndhuwur langit kae

Kapan bisa dakduweni

Sanajan namung ana ing alam impi

Saben wengi?

Paninggaran-pekalongan,2008

KANGEN

Wulan,

Durung marem rasane atiku

Anggon nyawang eseme sliramu

Dak rasa namung sakedhep netra

Wulan,

Durung  marem rasane atiku

Anggon mbabar crita

Babagan lara asmara

Wulan,

Pengin rasane atiku iki

Wektu kang namung sadhela mau

Bisa dadi dawa........

                                 Dawa....

                                                    Dawa.......

Sewindu malah durung apa-apa!

Paninggaran-pekalongan, 2008

  

LAYAT

Sore nglangut

Iring-iringan pelayat

Bareng-bareng mangkat

Ngeterke jenazah

Nuju omah abadi

Kanggo istirah

Ngadep ngarso Gusti

Sing nguwasani kita kabeh iki

Sore sepi

Godhong kembang makaman tiba siji-siji

 ning bumi

Melu bela sungkawa kanggo sing mati

Ya Allah, ya Robi!

                                                                                         Paninggaran-pekalongan,2009